理工大學民主牆事件四名學生被嚴懲，有人仲被判終身不被取錄，罰到咁重自然引起社會巨大迴響。噚日《城市論壇》就討論呢個議題，仲請埋身兼嶺南大學校董會成員嘅立法會議員何君堯做嘉賓，不過明明成單嘢同港獨無關，何君堯都可以拉到去當港獨咁鬧，最神奇係連主持蘇敬恆都無端端捱佢一棍，俾佢話垃圾。
話說成件事起因係理大民主牆爭議，學生走去搵理大高層理論引起衝突，成件事左睇右睇都睇唔到同港獨有乜關係，但何君堯算好嘢，一面又話對學生而言，被判終身不被取錄係重咗，但講到學生鬧大學高層媚共，何君堯即刻上身，話呢個唔係媚唔媚共問題，而係話分裂祖國，將香港成為獨立地方，係完全不可行。
「你講呢啲垃圾嚟㗎，敬恆！」
何君堯無端689上身自動波鬧港獨，連主持蘇B都一頭霧水，問何君堯查實事件同港獨有乜關係？呢個時候何君堯又嚟料，同蘇B講件事係一路醞釀，但明明冇人講過港獨，點醞釀都唔會有！喺事件入面被罰社會服務令嘅理大校董會學校成員李傲然亦澄清，今次事件純粹校內衝突，全因理大高層不願對話，同港獨完全無關。
不過，仲未完。蘇B問何君堯，如果涉事同學申請入讀嶺大，又會否取錄？原本問作為嶺大校董會成員嘅何君堯好正常，點知佢又上身，話一切照程序，唔會因為佢喺度幫到啲同學或者阻撓啲同學，之後一棍打去蘇B：「你講呢啲垃圾嚟㗎，敬恆！」但實真情係問嗰個垃圾？定係答嗰個先係垃圾？相信唔使八方講市民都睇到！
李八方