洋酒專家/新亞師兄趙崇偉（工管69）有空到中環吃午飯，於是請佢到上海總會。趙師兄話支持環保，從荃灣出中環，唔揸車，坐上巴士直達怡和大廈，再行路過嚟。畢業50年，年紀當然已過70，佢亦都打工、做老闆共50年，於80年代初創業，今天已成為本港一個老招牌洋酒入口批發商（Anrise-IMC，安昇國際），聽佢講紅酒白酒、威士忌常識，得益不淺。
問佢點解法國紅酒歷久不衰，佢話法國政府為咗保障酒質，保護品牌聲譽，酒莊種葡萄樹有法例規定，兩棵樹之間嘅距離以及一畝地可種樹幾多棵，力求維持沒有甚麼產能過剩問題。一啲具歷史嘅酒莊在葡萄壞時年，索性停產，所以能長久維持聲譽，故此買法國酒如收藏得宜，只會愈來愈好味，反而一啲新世界酒，一定要飲新鮮酒，收埋十年反而要倒咗佢！法國舊酒不宜旅行，最近一位朋友帶一支99年靚次伯出席晚宴，因「暈車浪」，要唞足兩小時先至可以回復原來狀態，急飲就會嘥料！
我哋的洋酒幼稚園生，只有聽的份兒，對講生意更有興趣，問佢市場狀況。佢話有具影響力嘅會所放棄從入口商入貨，直接「原產地直送」兼貼上會所招紙，影響所及，一啲本來供應會所嘅「新世界酒」唯有在外大平賣（批發價），故此呢行生意競爭好大，兼且外國酒現以中國大陸為主要市場，航船直送洋酒至大陸沿海港口，不再經香港轉運，影響到專門運酒來港嘅船期減少咗，港商訂貨要提早落單卜船期。總之做呢行再冇十年前咁輕鬆，2012年以後，十萬銀一瓶嘅紅酒好難賣得出咯，原因你懂的！
吃過飯，與投資E到歷山大廈COVA飲茶，因人多，地方逼，兩人坐在一枱打對面，與隔籬枱只有半隻手之遙，聽到隔籬講乜，好彩我地唔係講機密啫。
投資E本已退休，近年重出江湖搞Fintech，又熱心扶助社企投資，佢話目的已唔係賺大錢，而係尋找Impact Investing，對社會盡一份貢獻。左丁山在80年代熟識PE（private equity）呢行，現在已經out晒，問佢乜嘢叫做Impact Investing，投資E話世界潮流興ESG投資，講求社會效果，不純粹講銀紙，ESG即環境、社會、與管治，投資一個項目，要達到ESG目標，對整個社會有impact（影響力），投資效益以可量度的社會效果為主，財政回報為次，不少歐美大家族及長俸基金皆願投資於ESG基金，希望香港富豪家族亦追上潮流！講講吓，鄰枱一位先生突然主動向投資E遞上名片，原來佢係一間對沖基金經理，聽見投資E講Impact Investing，立即表示有機會搵投資E再探討喎！