現年38歲的何嘉莉跟前夫黃逸璋育有一子Jean，14年離婚後，翌年何嘉莉再閃嫁機師男友Gerald，前年9月為老公誕下囡囡Zoe，去年10月何嘉莉宣佈再度懷孕陀豬女，昨日公佈已於上周四剖腹誕下6.9磅囡囡Raina，母女平安。
大仔興奮
已有兩胎經驗的何嘉莉產前十分淡定，除了還在家中做舒展運動鬆一鬆，產前又在床上大吃漢堡包和薯條。何嘉莉自爆產前入手術室時仍然緊張，機師老公Gerald更有入產房打氣兼剪臍帶。家中再添囡囡，孻女孻心肝，何嘉莉為囡囡改英文名Raina，她說：「係拉丁名，代表王后意思。雖然佢係屋企入面最細，但我哋會當佢好似女王一樣，萬千寵愛。」
何嘉莉指家中一對子女急於要見妹妹，她表示生二女時有用她名義給哥哥送禮物，但這次卻沒為Raina代送禮物給兄姊，何嘉莉解釋：「阿仔見到BB好興奮，今次我冇代送禮物畀哥哥姐姐，之前囡囡出世就有送禮物畀哥哥，但今次我就話將個BB送咗畀佢哋，就係最好嘅禮物，佢哋都不知幾開心。」
仍然留院休息的何嘉莉，昨接受《蘋果》電話訪問時說：「今次都係全身麻醉，上一胎生女落藥啱啱好，所以生時有啲清醒狀態，自己覺得有啲驚，今次同麻醉師傾過，落多少少麻醉，等我一覺瞓醒就生咗。今次麻醉開刀生BB，醒番BB就喺身邊，過程好輕鬆，老公一路陪住。」
爭取休息
何嘉莉更吩咐老公Gerald多回家照顧一對子女，並檢查他們的功課，好讓她可以專心留在醫院爭取時間休息，她說：「我返到屋企，兩個小朋友又會叫住我，又可能玩同嘈，休息會冇咁多。」何嘉莉形容這胎生產順利，護士謂BB似她，何嘉莉卻說：「我仲未睇得出佢似邊個，佢得兩、三日人仔，起碼三、四個月樣子先定型。」何嘉莉早前陀女時曾感染B型鏈球菌，一度非常擔心，幸好囡囡出生未受感染。
採訪：陳杰