趙小姐和楊小姐，真的分手了嗎？雖然當事人之一「呢個時候唔想回應」，另一位又據說忙於陪陳姓朋友食飯放狗兼夾「與一向十分友好的傅明憲亦越來越親密」，拜了福爾摩斯為師的記者仍然勇往直前，施展神探奇功列出各種線索，包括共創的「無限愛有限公司」忽然易名、慈善機構董事辭任及寵物分家等等，憑蛛絲馬跡旁證她們勞燕分飛。咦，又不是改成「有限愛無限公司」，何必大驚小怪，娛樂圈社交圈天天不是甲劈砲便是乙蟬過別枝，打交收場又好和平講拜拜又好，大家都習以為常，眼尾掃過標題算數，誰認真誰就輸了。然而不是幸災樂禍，自己冇唔抵得人哋有，作為一個自命進步的基佬，我倒覺得號稱香港第一對聯婚的同性名人假如離異（呃，離同）消息屬實，完全應該講恭喜──別誤會，唔係美女貴婦電話傳遞那種咬牙切齒的恭喜，係誠心誠意的恭喜。合則結不合則離，出得嚟行誰沒有經過三五七段，當日情投意合一朝孔雀東南飛，畢明話齋「你還你，我還我」，既然異性戀者可以，同性戀者為什麼不可以，同志爭取平權，終極意義是你有的我也要有，身水身汗爭取結婚，當然必須享有離婚的自由，句號。
這樣的新聞，深諳找尋夾縫樂趣途徑的老馬不會不看留言，小丑們無條件呈獻天真和幼稚，包你笑到成個人摺成兩半（法語硬譯，對不起）。什麼「磨極都冇豆漿」，什麼「佢老竇最開心啦」，什麼「脫離豆腐，食下腸腸，就知係好嘢」，什麼「豆腐黨邊信得過㗎」，簡直祠堂門縫裏看人，把人都看直了。人家離婚箒，幾時話改攣歸直？