「集團業務總監」W小姐請左丁山到Octavium食午餐，左丁山都係第一次上去啫，Octavium甚有名氣，係8 1/2總廚Bombana開辦，不少食客慕名而至。人客以外籍人士為主，左丁山大鄉里，若非時代女性（即懂得流行時興潮流嘅人）W小姐帶住，都唔會諗起去Octavium食飯。食過嘞，感覺上價錢唔算克己，菜式可口程度未必好得過以前太古廣場嘅Domani，一款Mozzarella芝士更有不如Domani之處。唉，一講起，就懷念舊時請W小姐與秘書V在那裏吃午飯之活潑時光。好餐廳唔易搵㗎。
聽餐廳R講，Domani以前嘅經理，意大利人S君已經去咗杜拜打工，主理一間大型意大利菜餐廳，佢上星期特登去杜拜探班，住在最豪華嘅酒店，房間寬大，有全海景，餐廳有最佳美食，唯一遺憾之處就係冇酒飲，全酒店不准賣酒，令餐廳R周身唔聚財，但S君之餐廳設於金融區外幾哩路，佔地甚廣，居然有酒牌，在耶曆星期四晚（星期五例假）全場爆滿，晚上一點還坐滿人，餐廳R靜靜雞問有幾多營業額，一聽就幾乎醉倒，聽到話做兩晚嘅收入好過在香港做半個月喎。
杜拜係中東金融中心，有的是中東油錢，外國人到此打工，當然係為咗搵銀，餐廳R話杜拜之上層工作幾乎由歐洲美國白人壟斷，底層工人盡是南亞裔或菲律賓印尼工人，本地人做乜？大概係老闆或享福人士啩，一個特點係在餐廳見歐洲美女多到數不勝數，睇打扮又不似係寫字樓OL！
與餐廳R講完杜拜八卦，行到電車路，碰到虎媽A到中環辦事，佢一定要左丁山同佢去飲下午茶，於是走咗入「華豐」，佢話要問吓如何谷起兒子中文水平。從手機圖片見到佢位公子讀緊一本好厚嘅英文書，虎媽A話：「佢老師都讚佢英文好好，但叫佢讀中文書，就冇乜興趣，如何是好？」呢個係幾乎所有國際學校學生嘅家長所面對之難題，中環周圍都聽到一批又一批青年男女講英文，全無香港口音，走在前面，還以為後面係一群美國人在交談，故此識英文，在中環金融機構並無競爭優勢，中文與英文都一樣好掂就變成奇貨可居咯！番書仔盧安迪係理科尖子，但寫中文好暢順，勝過一位著名本地社會學教授（呢位教授經常在報紙發表評論文章，好似係從英文翻譯過嚟），上次見到盧安迪，佢話讀消閒書就讀中文書，如論語孟子，當時佢正讀緊「陳寅恪詩集」。唔怪得佢中文咁好，但知易行難，如何令兒女喜歡中文呢？虎媽A話肯畀補習費，叫左丁山介紹名師，但一定唔要谷考試攞5**嗰種，哎，去邊度搵呀！