今年一月初，信報總編輯郭艷明校友來電：「飲下午茶，介紹一位世姪畀你認識。」於是約咗在一個星期五，在陸羽飲茶之後，兩點半去到大道中梅賽德斯嘅餐廳飲杯伯爵紅茶，郭老總（人稱A姐），其實係起床不久，我地吃午餐即係報紙編輯嘅早餐，所以A姐就要咗一份大型三文治。坐在佢旁邊嗰位「世姪」，雖素未謀面，但從報紙上見過佢嘅照片，知道佢係邊位。果然，A姐介紹說：「呢位係盧安迪，佢爸爸盧建生，你都應該識咗好耐嘅啦，算係我兩人嘅世姪。佢後日返史丹福，問我可唔可以介紹左丁山見吓面喎！」
記得盧建生嘅，十幾年前訪問過佢，當年佢好似係Ericsson嘅香港高層，勢估唔到佢位公子依家咁出名，在信報每星期寫專欄，又出版咗一本書「自由的國度」，聽講賣得好唔錯，最巧合者，就係書本出版之前，A姐叫人搵咗肥仔K去為呢本書做出版編輯，話年輕人編審年輕人嘅書，容易有「同樣波長」，夾啲喎，而且肥仔K以前編輯過沈旭暉教授嘅新書，已有經驗也。
盧安迪送左丁山一本「自由的國度」，係信報專欄之文章精選，呢位世姪1994年出生，聖保羅男女中學理科尖子，2011年得國際奧林匹克競賽物理學金獎，2012年得數學銀獎，一畢業就入咗普林斯頓讀數學，現在於史丹福大學讀經濟學博士，未畢業已成名，係罕見嘅明日之星，大有機會成為聖保羅男女中學嘅第二位劉遵義（按：劉教授係聖保羅男女嘅會考狀元，到史丹福讀物理，於柏克萊取得經濟學博士學位，便在史丹福經濟系任教凡40年，係世界知名華裔經濟學家，二十幾歲已經成名）。
A姐在中大（崇基）主修經濟，我地三人飲茶講經濟，亦係有「同樣波長」。盧安迪之名字來自劉德華，盧建生與Andy Lau係極好朋友，故此小兒子就叫做Andy Lo，傳媒公關名人有Andy Ho（何安達），藝術界超級名人有Andy Warhol（安迪華荷），睇嚟為兒子孫子取名Andy，唔會錯得去邊！
盧安迪（信報專欄3月1日）講在史丹福聽Lawrence Summers（前美國財長、前哈佛校長，二十幾歲就成名的著名經濟學家）演講美中關係前景，演講廳內有一位讀中文嘅亞裔女性全程用電腦打字紀錄森瑪斯演講，打字聲擾人，一位白人男性對亞裔女士講：「這樣很干擾我們」，女士不理，幾分鐘後，白人叫女士停止，女士說：「不能」，又有一位黑人女士向亞裔女士交字條，亞裔女唔睇，掃咗字條落地。散會後，白人與亞裔女性交涉，亞裔女竟然話：「我覺得你是因為沒有被亞裔女性拒絕過才會這樣說！」嘩嘩嘩，女性與亞裔，原來可以係無禮行為嘅護身符，厲害了，亞裔女性！