禮拜四歐霸盃16強首回合，倫敦雙雄阿仙奴同車路士一天一地，兵工廠作客雷恩喺領先一球下有中堅柏柏斯達夫普路斯拎紅牌，結果俾雷恩反勝3:1，下星期四次回合要贏2:0或者贏夠3球先出到線；而車仔就主場輕鬆炒基輔戴拿模3:0。
對住法甲只排第10嘅雷恩，阿仙奴原本有個好開始，三分鐘就靠伊禾比喺禁區外幸運地先開紀錄，點知柏柏斯達夫普路斯唔生性，34同41分鐘好鹵莽咁連續兩次從後踢人，連拎兩張黃牌出場，雷恩42分鐘就靠保列基奧特喺禁區外勁射扳平。65分鐘兵工廠有蒙利爾擺烏龍，加上雷恩去到88分鐘再有伊斯美拿沙亞接應傳中，無人看管下頂入，兵工廠輸夠1:3完場。
賓艾化恥笑艾馬利
倒戈嘅施治就話好失望，梗係啦，失第三球嗰陣，小將古安杜斯仲喺禁區外散步唔回防，你話死唔死。阿仙奴下星期日英超主場會鬥曼聯，下星期四再對雷恩，要贏2:0或者3球先出到線。雷恩陣中最開心一定係法國中場賓艾化，事關佢之前效力巴黎聖日耳門嗰陣俾時任教練艾馬利一直雪藏，兩人仲曾經公開罵戰，今次乜仇都報晒，佢仲瘋狂恥笑艾馬利㖭：「佢一啲都冇變，仲係咁鍾意喺場邊手舞足蹈，我見到就想笑。」
韋利安複製當年罰球
相反，車路士就輕鬆得多，首回合主場對基輔全場圍攻對手，17分鐘就靠柏度洛迪古斯接應基奧特嘅後腳妙傳近門起腳先開紀錄，半場領先一球。換邊後，韋利安喺65分鐘主射罰球得手領先到2:0，呢球仲要同佢喺四年前嘅歐聯分組賽，對住同一個對手入嘅罰球一模一樣。韋利安威水，佢嘅師弟赫臣奧杜爾都唔執輸，完場前接應羅夫度斯卓克助攻射成3:0完場，出線形勢大好。
至於西甲代表方面，維拉利爾作客辛尼特贏3:1、華倫西亞就主場2:1擊敗卡斯洛達，至於「歐霸之王」西維爾就失威少少，主場同布拉格斯拉維亞踢成2:2，要等到次回合再分高下喇。