求驗客手記:曼迷慶祝俾司機插胸

求驗客手記:曼迷慶祝俾司機插胸

曼聯禮拜三晚喺歐聯16強奇蹟淘汰巴黎聖日耳門(PSG),一位紅魔球迷睇完波之後同埋三個朋友就搭的士返市中心,搭車嗰陣係咁慶祝,結果竟然俾個的士司機用刀插胸。據英國《天空體育》報道,嗰位的士司機因為不滿啲乘客係咁唱歌,於是喺路邊停低架車仲趕晒佢哋落車,之後再拔刀指嚇其中一位女球迷。案中受害人因為想保護女球迷,結果就中咗司機一刀。其他人見到即刻截停路過嘅其他車,再送傷者入院。根據報道,巴黎警方喺當地時間周四下晝拘捕咗個疑犯,但案中凶器就仲未搵得番。

呢邊廂有唔開心事發生,另一邊廂就有人好開心,講緊嘅就係PSG中場拉比奧特喇。呢位因為唔肯續約而被雪藏嘅23歲中場,喺球隊輸波之後居然仲同朋友去夜店消遣,結果搞到PSG球迷係咁炮轟佢,仲話佢係「叛徒」,睇怕續約一事都冇轉機喇。據《馬卡報》報道,佢嘅下一站好大機會係英超利物浦。