現年69歲的資深演員李兆基於2月12日入紙註冊，與拍拖逾30年的58歲女伴邱巧貞拉埋天窗。一對新人昨早在家中舉行簡單而隆重的婚禮，由邱巧貞胞妹及前黑社會大佬陳慎芝做證婚人，余美蓮律師主持婚禮，陳慎芝好友黃永成博士也在場見證。
陳慎芝與基哥認識50多年，曾勸導基哥戒毒兼推薦他入娛圈，陳慎芝回應《蘋果》時說：「今朝8點半開始，多謝律師義務做監婚人，我就做證婚人。阿基有乜未見過，呢啲濕濕碎。不過佢因為身體唔好，余美蓮律師要佢企兩次，雖然人少，但都揸正嚟做，要佢企起身宣誓同交換戒指，佢就有少少竧。過程好順利，大約半小時完成。」他透露新娘因為太緊張，交換戒指時不慎跌下。問到送甚麼禮物予一對新人？陳慎芝說：「都係兩封利是啦！」他指邱巧貞30年來照顧基哥，終於有名份，之前叫她「阿Ann」，今日叫「李太」，她已經很開心。
「演藝界冇人協助」
基哥早前獲政府恩恤獲派公屋，陳慎芝透露幸得一班基層朋友幫手，他說：「有一點都想澄清番，其實演藝界係冇人協助過佢，之前做手術係政府畀，阿基都有少少唔開心，但我覺得冇得怪人，要怪就怪自己唔識打算。好彩有班基層朋友，力到心到，最重要開心。」
採訪︰嵐山
