講開兩會會議，喺北京開會嘅香港人大、政協不乏民建聯、經民聯等成員，所以佢哋都會喺北京搞宴會，邀請港區人大政協同嘉賓出席。早幾年呢啲宴會都好豪，曾有傳媒報道過嘉賓拎住大包禮物走，但自從習近平上台全力打貪腐，又嚴禁幹部豪飲豪食，香港政黨都唔敢喺兩會期間再搞豪宴。但即使係咁，一場呢啲宴會單係送禮開支，隨時等於習主席十年八年人工。
豪送威士忌 料開支20萬
有民主派中人噚日同八方講，前晚佢睇facebook，無意中睇到朋友share一段Now新聞「政情網上行」，話民建聯係北京搞晚宴大派禮品包，內有藝術品錢罌同威士忌，呢個民主派人士見到支威士忌係Johnnie Walker Blue Label，話貴就唔算太貴，大約千二、千三蚊支，加埋件藝術品斷估成個禮品包兩千蚊內，當民記請100人，單禮品開支隨時都廿萬，據報習主席年薪不過14萬港紙咁上下，民記一晚送禮就送左習一年半嘅人工，總理李克強剛喺政府工作報告話要過緊日子，民記收唔到咩？