國務院港澳辦主任張曉明前日撰文解讀國家總理李克強嘅工作報告，代阿爺勁讚娥特勇於擔當，取締民族黨同DQ港獨候選人參與「立法會同區議會補選」，之但係娥特上任後區議會補選冇發生過DQ，公眾當然關注係咪為年底區選落定柯打啦。但八方噚日就發現，小明將文入面「阻止“港獨”分子參與立法會和區議會補選」呢句，靜雞雞刪咗「區議會」幾隻字，嘩，唔通港獨人士區選可以入閘？
民主派議員毛孟靜就話小明一定係鬼拍後尾枕，但講大咗又廢事引來閒言閒語話阿爺有前設，所以刪去字眼，形容成件事真係滑稽而悲哀。
「唔覺意將心嗰句講出嚟」
浸大新聞系高級講師呂秉權都話，小明讚娥特列出六件大事，反港獨事件佔頭兩位，可想而知阿爺對特區政府要求係政治工作行先，肯肯定小明刪字唔係代表對區會開綠燈，只係唔覺意將心嗰句講咗出嚟，變成事實上有錯誤，先要將呢個公開嘅底牌收返埋。