土地供應專責小組主席黃遠輝領軍嘅土地大辯論，喺爭議聲中結束，幸得娥特全盤接納建議，人人恭喜黃遠輝唔使做「周永新2.0」，成員之一嘅曾鈺成都力撐大辯論係史上最具公信力嘅公眾諮詢。原本成件事本應告一段落，但全國政協常委兼前財政司司長唐英年噚日喺北京見記者，唔知點解又拎番土地大辯論講。佢先寸爆大辯論本身就係推卸責任嘅做法，之後直情寸呢場諮詢「大辯論」結果變咗做大便！
「高度評價」 曲直難分
唐唐見記者時話自己對政府局部收回高爾夫球場建屋感到好失望，跟住就嚟料直斥土地大辯論唔係好做法，形容大辯論如同「我掉渣嘢出嚟，市民好似去茶餐廳揀飲料，加糖唔加糖、加檸檬、加奶」。佢話自己擔任財政司司長嗰時，都寫過四份財政預算案、都做咗好多諮詢，一樣都係大辯論，「但係我哋嘅大辯論冇變成大便」，講完呢句連佢自己都忍唔住笑。
不過，唐唐又補充，呢件事唔影響佢對娥特施政嘅高度評價。其實呢場大辯論係娥特一手推動嘅，唐唐唔滿意呢嚿大便，但又高度評價搞出呢個「蘇州屎」出嚟嘅人，究竟係乜嘢玩法呢？
李八方