記者小G話一班同性朋友搵佢在三月八日食飯慶祝婦女節，小G不經提醒，都唔記得有呢個婦女節咯，佢啲朋友話：「搵個藉口嚟聯誼食餐好嘅啫！」小G出道遲，唔知道香港有過男女同工不同酬（政府帶頭）呢回事；在傳媒界，老人家（哎吔，對唔住，中年人啫）退休者日眾，做上採主、總編輯嘅女士愈來愈多，小G入行以來，從來唔覺得有男女不同酬或性別歧視，偶然睇到英國BBC嘅女性僱員大控訴嘅新聞，覺得難以置信，乜英美還有男女同工不同酬呢回事？
在體育界方面，女運動員不斷呼籲男女同酬，其實體育運動與寫字樓工作不同，在寫字樓工作，男女無分別，當然應該同工同酬，但體育運動收入小部份靠現場觀眾，大部份靠電視直播版權費，邊樣收視率高就邊個能夠拿到高薪。舉個簡單例子：電視轉播排球比賽，係女排收視率高吖，還是男排？左丁山答案係女排（因男子排球速度太快，電視上播出，缺乏趣味），女排球員值得有更高薪酬。但男子NBA顯然比女子WNBA收視率高出太多，女籃球員嗌破喉嚨都唔應該有勒邦占士咁嘅薪資。
香港在男女平等方面，十分先進，絕無歧視女性，特首已是威風八面嘅女士啦，香港以金融業為經濟命脈，幾大發鈔銀行之中，香港CEO有滙豐施穎茵，施女士之上司係大中華區行政總裁黃碧娟，渣打有禤惠儀，中銀香港有副總裁龔楊恩慈，最本地化嘅恒生銀行有鄭慧敏，鄭女士更是恒生連續第三位女CEO（之前有梁高美懿，李慧敏），最大外資銀行有花旗香港CEO伍燕儀，中資中信銀行（國際）嘅CEO係吳秋玉，今天香港銀行界之實際日常管理人，女士佔領何止半邊天！此外還有證監會副行政總裁梁鳳儀（傳聞係金管局總裁候選人之一），港交所主席史美倫，更係陣容鼎盛，威過紐約倫敦。公關傳媒界方面，女士更是遍地開花，掌握大權，例如中電Quince，港燈Mimi，長和Laura，長實Wendy等等。去年大學畢業禮季節，左丁山留意到中大MSc in Marketing（市場學理科碩士）之畢業廣告特刊之中，女性名字佔咗八成以上，當時曾向小G慨嘆：「乜香港男士唔鍾意市場學嘅咩？還是女士更有上進心？」有咁多女性稱雄例子，唔怪得小G以為佢阿媽嗰一代先至會慶祝三八婦女節！三八之前，一位「集團業務總監」W小姐搵左丁山吃飯，因為男女平等，梗係唔同W小姐爭畀錢啦！三十年前曾與女賓架D吃飯，佢拿出信用咭找數，侍應望咗左丁山幾眼，依家侍應見到同樣情況，唔會眼望望嘅嘞！