上星期四中午飯局，退休銀行董事H做東，地點在新開酒店，幾位資深食家皆是荷包有錢之人，食好嘢從不問價錢，但總要覺得物有所值，性價比高，頭盤係點心幾拼，地產F一食就皺眉頭，出聲問：「喂，跌晒Watt咯，同一個月前左丁山在此做東嗰啲點心完全走樣嘅？呢度要畀五星級酒店價錢，但點心係街坊酒樓嗰類，點搞呀？」董事H做主人亦覺冇乜癮，如果係收街坊價錢，佢又會冇乜所謂嘅，不過唔係呢！
經理走入嚟猛講鎖你，好彩之後嘅順德小菜還是好出色，胡椒煎魚頭係靚到冇得彈，人人讚好，算係補番飛，但到甜品蛋白杏仁茶又唔掂，與陸羽相差太遠噃。富翁T捉住夥計問點解，係唔係廚房換咗人？後來得知，順德菜師傅仍然在此，故此水平保持一級，但點心師傅就走咗幾位，一時之間青黃不接，正在努力補救中。
都話咯，香港各行各業缺人，廚師更換如走馬燈，聽餐飲R講過無數次啦，佢經營餐廳共有半打以上，有生意旺嘅，有生意淡嘅，一樣難請人。一間生意好好嗰時，廚師做到踢晒腳，話辛苦得滯，辭職鬆人；想從生意淡嗰間調人過去，廚師話咪搞我，唔鍾意調職加辛苦個辛，又辭職鬆人，餐飲R氣到吹鬚碌眼，最後有一位已退休廚師，退休後成日在公屋遊樂場同長者捉棋，覺得好無聊，答應餐飲R重出江湖，當救急奇兵。所以話羅致光局長IQ爆棚，發明長命百二歲，六十歲中年人要打工，唔好咁年輕就退休呀，今時今日社會十分需要佢地！
飯局閒談，董事H話聽到養和醫院日前嚟咗成千人，皆是內地女士，塞爆醫院，養和唯有帶晒佢地到一層樓等候。咁多內地女士到養和搞邊科？打HPV針囉（預防子宮頸癌）。內地女同胞咁消息靈通？聽講係內地有網站宣稱養和有大把HPV疫苗，組織女士疫苗團到養和打針，咋一聲就將養和塞爆。傳聞每針收6000港元，一千人就收足600萬，養和財源滾滾而來，真係醫院稱王。
到咗星期五，郭家麒醫生議員在蘋果評論版講：「養和淪陷」，就係講HPV疫苗一事。點淪陷呀？養和收錢收到笑就真！在陸羽飯局問醫生C點解一針收6000咁貴，佢話HPV疫苗唔係時時有大量供應，每劑成本價要起碼2000元，本港女士少用，但內地人對內地疫苗冇信心，故此來香港囉。