噚日係驚蟄，民間有打小人嘅傳統。言行比會友王國興誇張10倍嘅工聯會醬爆陸頌雄，又喺社交網站上喊打喊殺，聲稱打小人可以心情舒暢，仲攞咗美國駐港總領事唐偉康嚟做「人辦」，不過醬爆咁玩不但俾網民寸佢可能犯國際公約，仲send埋畀美國總統特朗普，連美國駐港總領事館都玩埋一份，暗寸醬爆佢小心啲，醬爆呢啲小學雞行為，隨時變外交風波！
陸頌雄喺自己fb專頁教人用打小人app，仲整咗教學圖，話先要影低個小人樣，寫埋名，然後跟口訣同節奏搖動或拍打部電話，直至小人面部扭曲先大功告成。至於點解要用唐偉康，佢就話因為唐偉康「衰多口」。
有連登網民就寸醬爆，引述外交部駐港特派員公署網頁中有關「外交特權與豁免」嗰版，根據《維也納外交關係公約》規定，「接受國對外交代表應示尊重，並應採取一切適當步驟以防止其人身、自由或尊嚴受有任何侵犯」。又有網民大讚工聯會終於「文明」咗，「唔用菠蘿」，仲話一於譯做英文，分享去侵侵個Twitter！而美國駐港總領事館喺fb出po，先hashtag驚蟄，再加一句「千祈唔好打錯人呀！」暗寸陳勇搞錯英美領事之餘，亦警告醬爆呢啲小學雞，咪以為外國領事可以亂玩！有網民大讚美領館回應，「美利堅，確係堅，而且不失幽默感」，又話美領館夠貼地，有sense of humour ，用幾隻字就可以打殘醬爆。
李八方