【黑鏡線索】
朋友黃雅麗Leona近排寫了幾篇關於女性創業嘅文章，講女創業人喺行內遇到嘅障礙，比男嘅多。我以前一直冇留意呢個問題，最大原因係根本好少見有女創業人。
直到後來認識咗一位女創業人，講講吓，先從佢口中知道，原來佢身為女性，喺創業路上遇到嘅怪事，係我身為男性從來冇遇過嘅。例如，佢同人講佢創業，好多時男性同行會問佢係咪賺錢買花戴。大佬，畀着我拋個身出嚟創業，你三唔識七就當我係玩票，我肯定㷫到爆炸。又例如，見投資者會忽然問佢有冇男朋友，而我就未聽過男創業人俾人問有冇女朋友。
我以前一路以為男同女喺社會嘅待遇差唔多，我自己從來請人都冇關心過係男定女。自從兩個女出世，我開始留意多咗女性創業同喺科技行業就業嘅情況，先發現自己一直超天真，當朋友信手拈來同我講佢嘅經歷，我仲好驚訝咁嘅樣。我估，同我一樣對女性問題咁無知嘅人，喺科技行業，應該佔唔少，而呢種無知相信係令情況一直冇乜改善嘅障礙之一。
女性難過關 過到就超班
講番Leona嘅文章，佢話：「曾經有個創業的朋友邀請我加入他的團隊成為合夥人（co-founder），原因是研究顯示，有女合夥人的初創成功率較高。我這位一切講求科學和證據的創業朋友如是說。」
喺現有團隊加個女性，就可以提高成功率？有冇咁便宜嘅事情？換句話講，為咗增加成功率而加個女夥伴，係咪科學嘅做法？
首先，歧視嘅一個定義，係用唔同標準去量度。All things being equal，男嘅，八十分就過關，女嘅，就要九十先過關，咁即係特別為難女性。呢種歧視，會做成乜嘢結果？就係因為條bar定得特別高，所以：一，女性過關比例低過男性；二，過到關嘅女性比男性over qualified，因此最後女性成功率較高。
以上兩點，Leona所引嘅研究都一一證實，假設研究結果可信，即可總結對女性確實有歧視。不過返番去原來嘅問題：既然數據話有女性合夥人嘅團隊，成績比全男好，咁係咪加番個女性，就可以成功啲？
上面睇到，女性成績較好，唔一定係因為女性勁啲，可以純粹係某啲關口，例如集資嘅時候，對女性團隊要求高啲所致。簡單啲講，歧視係因，較低過關率和較高成功率係果。所以，Leona嘅朋友團隊，一旦加個女性，第一個後果，係反而難咗過關。因為難咗過關，所以萬一過到，最終嘅成功率會比全男團隊高，不過唔一定會比自己本來嘅成功率高。即係話，唯一改變嘅，係多咗機會提早出局，僅此而已，得不償失。創業九死一生，想搵方法hack件事係可以理解，我亦支持改變行業有意無意對女性嘅偏見，但以為加個女性就係成功嘅捷徑，就未免太天真喇。不過我估，其實Leona嘅朋友亦深明呢一點，只係搵個含蓄啲嘅理由招攬佢入局吧。
撰文：宋漢生