很多歐洲人視酒如水，曾到外國睇波的球迷，都不難發現在開波前兩三小時，已經有大批球迷在場外聚集，並飲至酩酊大醉。這種「未出發、先興奮」的睇波文化，其實只要不影響其他人，姑且尚可當作是一種另類的生活態度；但若然有人乘機博亂、借醉行兇，這種足球流氓的行為便不要得了！
從古至今，英法球迷都以滋事聞名，部份害群之馬更先後多次趁睇波飲到醉醺醺搞事。雖然現時歐洲不少有名球場，閘前保安已做得相當仔細，不過要阻止這班有組織犯案的足球流氓攜帶違禁品進場，似乎仍有不足之處。
首回合的「曼巴大戰」，歐洲足協對於曼聯與巴黎聖日耳門球迷的惡行，早前已正式向兩會提出起訴。雖說事件最終只是罰款了事，但曼聯被指其球迷向場內掟雜物及阻塞樓梯的同時，巴黎聖日耳門一方，亦被指有球迷在場內燃點煙花、滋擾群眾，並且在看台上肆意破壞等罪名。
這邊廂當迪馬利亞入波，曼聯球迷竟向其掟玻璃酒樽洩憤；那邊廂的巴黎球迷亦非善類，除了在看台上大放煙花外，球隊即使作客贏波，滋事者仍然以拆除奧脫福座位，來一洩心頭之恨！
其實早在今屆歐聯分組賽，巴黎主場鬥紅星時，已發生過類似事件，巴黎會方亦已永久終止30名滋事球迷的會籍。但當殺一未能儆百之際，曼巴兩班戰鬥民族，今晚又會移師至巴黎進行次回合的「激戰」。首回合，巴黎球迷作客拆球場成功，有兩個作客入球在手，次回合回師主場。但願曼聯球迷不要以暴易暴，專心一志為紅魔打氣，期望上演絕地反擊，畢竟「波係圓嘅」。
有線足球評述員
劉健基
mailto:[email protected]