紅軍爭標路難行喇!講緊嘅唔係佢哋周日再失分,而係因為球王比利開聲力撐,話信佢哋仲可以贏到英超。比利有幾「燈」球壇人人皆知,佢周一就為咗祝福利物浦名宿杜格利殊68歲生日,喺Twitter度發帖:「要向呢位紅軍英雄講聲生日快樂,杜格利殊。我由一開始就支持利物浦贏英超,到𠵱家我仲信佢哋得。」利物浦周日同愛華頓互交白卷後,已經被曼城以一分反壓,跌落第二位。