《粵港澳大灣區發展規劃綱要》出台後，成為今年北京兩會熱爆議題。港區政協委員噚日朝早舉行小組會議，唔少地產界同工商界代表都被問到大灣區機遇，其中長和系主席李澤鉅都被捕獲，佢回應指：「香港人咁聰明，大灣區一定有好多商機」。但被問到係咪意味長實會大力喺大灣區發展時，佢就冇回應嘞，唔似得其他財團咁，大鑼大鼓話會加大喺大灣區嘅投資喎。睇番吖，李家近年不時拋售內地資產，轉攻海外市場，又難怪李澤鉅呢番讚港人「聰明」、指大灣區多「商機」嘅言論，令政界有剝花生空間，覺得係咪有弦外之音。
至於其他紅噹噹愛國商人喇喎，唔使叫都會排住隊輪流撐；包括世茂房地產主席許榮茂，話自己會帶青年團去大灣區，考察投資同創業機會，總之身體力行瞓身支持。最年輕政協委員、「玩具大王」蔡志明獨子蔡加讚話大灣區商機處處，自己都研究緊邊個灣區城市人口消費有潛力，自言一直搵緊大灣區嘅佈局機會。