前曼聯同阿仙奴球星尹佩斯（RVP）周日連中三元，幫飛燕諾喺荷甲主場以4:0大炒安曼，今季入到14球，RVP生涯聯賽入球仲突破200球里程碑。35歲嘅尹佩斯今季之後就會掛靴，佢喺周日嘅荷甲，喺35分鐘就幫飛燕諾先開紀錄，職業生涯聯賽入球達到200球，其後RVP喺下半場再有兩球進賬，完成「帽子戲法」之後，生涯聯賽總入球達到202球。連同貝侯斯錦上添花射入嗰球，飛燕諾最後以4:0大勝安曼。RVP兩次效力飛燕諾嘅入球數係33球，連同佢之前效力阿仙奴嘅96球、曼聯嘅48球仲有費倫巴治嗰25球，生涯聯賽入球終於破200粒，喺掛靴前總算有個美好回憶。