白鴿黨去年黨慶，娥特捐三萬畀李華明上台唱歌搞出大和解風波；今年白鴿黨就因不滿娥特過去一年施政表現，經中委會開會討論後，決定唔再請佢出席本月19日、以「整裝待發」為主題嘅黨慶，律政司長鄭若驊同立法會主席梁君彥都「被禁足」。
籌款目標400萬
不過娥特似乎想顯示自己心胸廣闊過曾下令官員杯葛黨慶嘅689，並無下令官員杯葛。結果連埋特首辦主任陳國基在內，至今答應會出席酒會嘅司局長同副局長多達19人，包括政務司長張建宗、財政司長陳茂波、公務員事務局長羅智光、保安局長李家超、政制及內地事務局長聶德權、教育局長楊潤雄、財庫局長劉怡翔、運房局長陳帆、同埋勞福局長羅致光，其他無局長到嘅局，都會派副局長現身。
政府官員出席反應異常熱烈，羅健熙話，該黨一向樂意喺工作上同官員保持溝通，至於娥特未有如689般下令官員杯葛該黨酒會，羅笑言唔會用689做基準，至於同娥特關係喺過去一年係咪差咗時，佢就話留畀巿民自己去判斷，佢覺得無乜大改變。
身兼該黨籌款委員會主席嘅深水埗區議員袁海文話，希望該黨有足夠資源迎戰選舉年，所以籌款目標同去年一樣都係400萬，但席數60席就多咗。由於相信嚟緊香港經濟麻麻，加上該黨唔請娥特，或影響商界捐款意欲，所以佢已要求黨友搵多啲水，將該黨議員、區議員、社區主任嘅籌款目標定得比去年高10%。
李八方