厲害了，武球王！一月底由中超登陸西甲嘅中國國腳武磊，上星期六幫愛斯賓奴單刀入波，開齋之餘更加係中國球員喺西甲首球，幫球隊主場贏華拉度列3:1，佢賽後送件波衫畀觀眾席嘅小球迷，對方仲開心到喊，可見武球王贏晒愛奴球迷民心，中國網民仲話個入波好似美斯咁！
武磊自一月由上海上港轉會愛斯賓奴後，上星期六已經係第五次喺西甲上陣，仲連續三場踢正選左翼，今場踢到65分鐘，愛奴贏緊2:1時，27歲嘅武磊接應隊友沙治戴達嘅直線，突破越位單刀冷靜趟地波射入，幫球隊贏3:1，而武磊就射入中國球員嘅西甲首球，自從有武磊，愛奴5場波2勝3和未輸過，而武磊完場前七分鐘都功成身退被換走，接受全場球迷掌聲。武磊呢個入波，係5大聯賽事隔10年後，第一次有中國球員入波，上次已經係08年12月嘅德甲，邵佳一踢科特布斯入波，1:1打和利華古遜。
賽後送波衫小球迷感動到喊
有中國球員西甲入波喎，梗係振奮13億人，而且武磊嘅表現都俘虜到愛奴球迷嘅心，佢完場後去觀眾席送波衫畀個小球迷，搞到小朋友激動到當場掩臉落淚，露出一副難以置信嘅表情，仲即刻着佢件新鮮熱辣24號波衫上身，而中國媒體同網民梗係即刻出動，內媒以「中國驕傲！武磊離場享受全場掌聲 他征服了西甲」起題，夠晒誇張，有網民都睇唔過眼，叫媒體唔好過份吹捧，將武磊形容到球王咁，盞畀佢更大壓力，起碼都睇多幾場，睇吓佢喺西甲企唔企得穩先。
內媒：征服西甲
雖然有部份網民係理性，不過就有更多唔理性嘅人，有網民留言話，武磊係「全村的希望」、「牛逼呀！上海球迷今夜無眠」等，甚至有人話個入波好似美斯：「武球王這射門太像梅西（美斯的內地譯名）了！」亦都有人攻擊理性網民，話中國人係時候慶祝下：「十多年的等待，難道不值得驕傲一下嗎？你看着現場揮舞着五星紅旗不自豪嗎？你所謂的驕傲的資格是不是中國隊拿到世界盃冠軍呢？兄弟你的內心太不陽光了。」