理工大學幾名學生代表因闖入大學高層辦公室，結果俾大學當局分別罰停學甚至即時退學兼永不取錄，其中一條罪係鬧爆時任暫任副校長（學生）沈岐平同埋學務長莫志明，話佢哋「收共產黨錢收得咁過癮，舐共舐得你哋咁開心吖嗱，屎忽鬼」，令二人感被冒犯。鬧人「屎忽鬼、舐共」係咪真係誹謗呢？八方相信自有公論，不過幾年前曾有市民喺立法會內大鬧高官「屎忽鬼、舐共」，冇俾人趕走，亦唔使被罰永遠不准進入立法會。
2015年5月立會舉行政改公聽會，大批年輕人自創寸爆政府、建制派嘅搞鬼組織名出席會議，其中代表「愛港之子否決譚耀宗大聯盟」嘅少女王詩詠（圖），爆seed狠批政改三人組，「衷心想講一句，你哋班屎忽鬼高官慳啲啦！」當時譚耀宗只淡然話「唔可以講啲粗俗嘅說話」，仲畀佢繼續發言，少女再鬧高官「垃圾」，「你哋呢班人竟然為咗舐共上演一場真高官偽落區一票做特首嘅真人騷」，但譚耀宗一直畀佢講，可見理大一啲高層對異見包容嘅胸襟真係衰過民建聯。