第四球證換人一般都會用電子顯示牌，以便職球員同現場球迷可以睇得清清楚楚，但上個禮拜四一場由巴西球隊明尼路對烏拉圭迪芬沙士砵亭嘅自由盃外圍賽，因為個電子顯示牌被鎖喺明尼路辦公室入面，球證惟有用A4紙代替，仲用原子筆畫上一個立體嘅數字，作為換人號碼指示，唔知仲以為係業餘波，場面都咪話唔搞笑。