曼聯榮膺1999年三冠王嘅一班功臣，將會喺5月26日由費格遜爵士出山領軍，同當年歐聯決賽對手拜仁慕尼黑嘅名宿踢一場20周年紀念賽。當年年紀最大嘅紅魔名將、已經55歲嘅後備門將雲迪古將會同正印門將舒米高齊齊出席，後者就大讚雲迪古可能係世上最弗嘅55歲男人，所以自己到時好好彩唔使踢足全場。而紅魔亦公佈後衞史譚、艾雲等喺大軍名單。