財政司司長「波叔」陳茂波噚日朝喺立法會公佈新一份財政預算案，多個政黨同民間團體，包括人民力量、社民連、民主黨、爭取全民退保聯席、工聯會等都到場請願。為咗響應波叔早前喺facebook呼籲巿民「交波」提意見，更講明自己會「親自接波」嘅「豪言壯語」，噚日唔少示威者都化身「球員」，所用的示威道具都係波，唔同大細嘅足球、西瓜波、膠波乜都齊，唔講仲以為踢緊世界盃。
保安化身守門員
其中人民力量同社民連就最有心，早喺預算案公佈前三粒鐘，即晨早8點已到立法會示威區佔據有利位置示威，表達要求政府全民回水一萬元、設立全民退保、解決醫療爆煲等訴求。可惜本月初喺維園出席經民聯攤檔開幕禮後，被社民連女將狙擊到連私家車都上唔到，要改搭地鐵嘅波叔，完全冇行經示威區，只喺大批保安同便衣警察護航下，經示威者不能進入嘅立法會側門通道入場。
人民力量成員、旺角鳩嗚團女將錢寶芬就最有先見之明，一早突破重圍入咗波叔途經嘅公民廣場，希望波叔親自接波。可惜最終喺化身「守門員」嘅政總保安解圍下，佢拋出嘅兩個膠波完全埋唔到波叔身。社民連成員拋出嘅膠波，則喺立法會保安出動鐵馬同人牆阻擋下，亦未能命中目標。早前話過會「親自接波」嘅波叔最終全面走數，見波就避，波皮都冇掂過就入咗立法會。
李八方