中美貿易談判露出曙光，特朗普急不及待發Twitter，講咗兩三次：「談判有重要進展」，且在白宮橢圓形辦公室內當住劉鶴面，向美國貿易代表黎希澤面斥不雅，顯見此君心煩氣躁，正中中國下懷。中國對外談判，擅長打打談談，談談打打，邊談邊打，邊打邊談，一時軟皮蛇願讓步，一時破口大罵堅守立場，總之係與對方鬥耐性，拖拖拉拉直至對方為了競選戰或其他內在原因，願與中國妥協為止。呢套談判策略係周恩來在50年代與美國舉行華沙談判時被確定下來的，應付特朗普之所謂The Art of the Deal幾啱用。拋浪頭，擺大頭，發狠話，開天索價，呢套用來傾生意並無不妥，因為西方談判術早有名言there is no deal we cannot walk away from，做生意，講錢啫，在國與國談判之中，國際貿易講求互通有無，交易求利，特別係中國有14億人大市場，正正就是美國商人（特朗普金主）及美國農民（選票票倉）不能walk away from，是故特朗普根本貌鷹實鴿，與黎希澤之大鷹派有基本不同。事到急時，特朗普就會落雨收柴，希望不失面子，能與習近平簽一份協議就算數！
特朗普嘅大弱點係講說話太盡，難以轉軚，將自己陷於困境，唯有死砌到底，佢堅決要興建墨西哥圍牆，以維持競選承諾，點知共和黨掌控眾議院時唔申請撥款，到民主黨中期選舉勝利後先至大力要求，就畀民主黨封殺，於是夾硬宣佈國家進入緊急狀態，從其他預算搶錢建圍牆，立即受到環保人士、私人地主、民主黨控制之州政府，入稟法庭挑戰，預料要搞兩年，拖到2020年總統大選；穆勒調查特朗普之通俄門事件，已進入尾聲，重量級報告（起碼一千頁）一發表白宮就有排煩；委內瑞拉局勢越來越似內戰前夕，美國及其他人士運送救援物資到委內瑞拉邊境不得其門而入，馬杜羅寧願人民餓死病死，或者畀軍隊射殺，都唔准佢地受外人恩惠，美國係委內瑞拉反對派最重要嘅撐腰國家，已不能後退。還有金正恩呢一兩日在河內與特朗普談判！呢位美國總統有勇無謀，只用擦鞋仔，四處樹敵為自己製造問題，對美國有深遠影響之中美貿易談判，佢反而不能聚焦，集中精神來應付，唔怪得習近平肯同佢做朋友也。