【黑鏡線索】
行內其中一款常見新聞，係宣佈籌咗錢。以下係前日嘅報道，借嚟做例子：「總部位於香港的物流初創XXX今天宣佈，它由高瓴資本的D1輪、紅杉資本中國基金領投D2輪籌集了3億美元，即相當於23.4億港元的融資。」
呢類報道，應該點樣理解消化？係一個有趣問題，對創業人嚟講，亦都係一個重要嘅問題。
核心問題係，創意如果要稱得上成功，間公司應唔應該喺成個生命周期埋單嘅時候，最少打個和？我明，搞一大輪先打個和，聽起上嚟好頹，時間同利息都蝕埋，但為簡單起見，即管用住呢條線先。
投資期或長或短 經歷6階段
當然，成功嘅定義可以有好多款，亦唔代表賺錢先係唯一標準。但係我估，喺唔少創業人心目中，問心嗰句，賺錢係其中一個標準，打和係最最最低消費。
絕大部份創業，都有投資期，或長或短。如果要做到靠每月盈利，做到埋單時打個和，即係會經歷以下嘅階段：
1.投資期開始，燒錢。
2.有啲成績，攞多啲去燒，燒快啲。
3.投資有回報，燒慢啲。
4.每月打和唔使再燒，過咗好望角。
5.每月賺錢，開始收回以前燒嘅錢。
6.終於全數收回以前燒嘅錢，實現歷史上打和。
第一階段，要籌錢燒。第二階段，要籌更多錢燒。第三階段，如果已燒晒，再籌一個可能細少少嘅一輪去燒。之後，就冇逼切性籌錢，而係掉番轉賺錢儲或還或派。
用以上嘅框架，文首嘅報道，可以改寫成：
「總部位於香港的物流初創XXX今天宣佈，它由高瓴資本的D1輪、紅杉資本中國基金領投D2輪籌集了3億美元，即相當於23.4億港元的融資去燒，是迄今最大嘅一輪，好大機會係再燒得快啲，即是歷史利潤線再往下沉一大步，意味住需要在未來做到更多（約23億）的利潤，先可以實現終於做到歷史上打和。」
越籌錢去燒越大壓力 唔存在上限
唔投資唔成事，但係越籌得多去燒，就越大壓力喺未來賺嘅錢追番，咁燒嘅上限定幾多先啱？第一係睇個題目，有啲題目只容許大燒，唔大燒會一早死咗。第二係睇創業人嘅風格，有啲人願意喺刀口上生活，有啲人唔願意。
所謂上限，好多時現實裏唔存在，就算有都係不斷提升，創業嘅，洗濕咗個頭，橫豎都燒大咗，都溝淡咗，如果投資者仲肯落叠，總有方法說服自己燒大埋佢到結尾。投資嘅，洗濕個頭，手上唔係咁多去到咁後期嘅項目，總有方法說服自己捱多段，至多喺條件上加辣再加辣。
當然，創業嘅同投資嘅，其實唔一定要關心歷史上打和，相信有人比較關心自己退到場袋袋平安，被收購或者上到啲唔使賺錢都可以上嘅交易所，過咗海就神仙。
一旦去到獨角獸階段，就唔能夠以創業板為逃生目標，即係始終要賺到錢，而「始終會賺到錢」嘅邏輯，係假設成件事有好大好大嘅固定成本，要燒好多，但大極都係固定，所以去到足夠大嘅規模，加埋斷估可以恃大加價，總會追得番，N倍奉還。問題係，其實非固定成本嘅比例，係咪咁細？個規模要幾大，先轉到個角？大到如剛裁二千人嘅滴滴，一年蝕一百億人民幣，WeWork九個月燒一百二十億美金，Uber三個月就蝕一百一十億美金。咁大都完全未見轉角蹤影，音樂總會停，到時就知邊個一直在裸泳。歷史上打個和。
撰文：宋漢生