【拆局】財政司司長陳茂波昨公佈的預算案，明顯將他提出的「撐企業、保就業、穩經濟」放在推動創科及大灣區產業上。有專業界人士直言，陳此舉雖可向北京交差，但若香港下半年經濟真的如政府估計般下滑，這些投資根本無法應付即時經濟環境變壞所出現問題，「呢啲投資最少幾年甚至十幾年先見成果，萬一香港下半年經濟變壞，就真係應晒車公支籤講：『那知餅食不充腸』」。
車公籤文隨時應驗
該專業界中人笑言，政府為回應中央搞大灣區產業及創新科技，不惜大量投資，他同意這些投資要做，「但中短期應對經濟環境變壞，唔係靠呢啲長遠政策」，但中短期政府有何「撐企業、保就業、穩經濟」政策應對經濟突變？預算案又未有具體交代，「財爺只係話會密切留意情況」，難免令他想起農曆年車公籤文「石田為業喜非常，畫餅將來未見香」，「見到大灣區就吹奏，但呢啲願景嘅嘢，其實對香港中短期經濟冇幫助」。
他直言萬一下半年外圍氣氛轉差，香港經濟隨之變壞，以這份預算案措施不足以應對，「除非陳茂波到時再出招，否則單靠呢份預算不足以應對即時危機」。
■記者莫劍弦