車路士門將阿列沙巴拿加（Kepa）喺星期日嘅英聯盃決賽，唔肯聽領隊沙利嘅指示換出，成為球壇熱話，更有傳車仔更衣室已分裂做兩派——撐沙利同撐Kepa，而球會星期一就罰Kepa一星期人工，事主亦向全隊上下道歉，曾經執教車仔兩次嘅摩連奴，似乎就嫌舊東家唔夠亂，公開撐呢位西班牙門將之餘，都食花生咁話好彩佢唔係自己麾下嘅球員。
道歉聲明死撐話誤會
車路士七國咁亂嘅勢頭，因為英聯盃輸波加上Kepa漠視沙利嘅指示，進一步升溫，沙利被炒嘅傳聞已經被Kepa呢單嘢蓋過，唔聽領隊指示咁大件事，車路士方面都好難當冇事發生，球會特別就事件發表聲明，表示會扣Kepa一個星期人工，仲特登上載咗兩位當事人對今次事件嘅感想。
早前唔肯道歉、話係一場誤會嘅Kepa態度軟化，喺聲明向沙利同球會認錯：「我好開心可以首次為車路士喺英聯盃決賽上陣，亦為球隊嘅表現感到自豪。我為當日嘅事作出過反省，雖然事件出於我對領隊嘅指示有所誤解，但我嘅處理方式上的確犯咗大錯，對此我要向球迷道歉，我願意接受球會處罰並會從中學習。」
而當日發晒火嬲到想走嘅沙利就強調，同Kepa冇任何心結：「我哋事後會面咗，明白係誤會，而佢亦知自己嘅應對方式有問題，佢已經向我同其他隊友道歉，對我嚟講事件已經告一段落。」件事係咪真係「已解決」，就只有佢哋先知喇。2015年俾車仔班球員逼走嘅摩佬，就出嚟抽水食吓花生，話自己好欣賞Kepa嘅膽識：「Kepa顯出佢有好強嘅個性同信心，佢希望證明佢可以喺互射12碼階段救到波，我鍾意呢種球員。」
摩佬：好彩唔係我教
摩佬咁講即係擺明落沙利面啦？又唔係喎，佢話同情沙利嘅處境，仲話：「我覺得自己好好彩未經歷過呢種情況，Kepa嘅舉動搞到佢嘅領隊同助教冇晒權威，佢嘅行為令隊友好尷尬。」
當日力勸Kepa聽沙利指示離場嘅大衛雷斯都有嘢講：「我當時同佢講要尊重領隊嘅決定。我唔知道領隊當時係認為Kepa有傷在身，抑或係出於戰術上嘅決定。」