《蘋果》早排頭版直擊患罕見癌病嘅四歲童童，到台灣接受質子治療，唔少讀者睇完都覺得心酸。因旺角騷亂正喺獄中服刑嘅盧建民（影攝食）亦有感而發，特別請囚友畫咗張得意卡通公仔慰問卡，寄嚟《蘋果》託我哋轉交童童，為佢打氣，希望佢早日康復。
「有錢起大白象 無錢助基層」
八方同事已經將卡交到童爸手上，佢話畀咗童童睇，認為畫得好靚，多謝大家對童童祝福，「我哋會繼續努力！其實去年底曾收到兩位市民寄嚟嘅慰問卡，至今深深感動，因為現今社會要攞起支筆寫字好困難，所以佢哋嘅慰問卡，一字一句都係我哋嘅精神支柱，我間中會攞出嚟睇，佢哋嘅支持協助我哋度過每個難關」。童童已經完成28次質子治療，上星期亦做咗化療，因化療近日白血球急跌，醫生擔心佢抵抗力下降，安排留醫觀察，並打咗增加白血球藥物，若好轉會回港繼續餘下廿多次化療。
盧建民喺信中悲嘆：「點解香港有錢起大白象工程，而無資源為基層、醫療增撥備呢？點解養和醫院肯耗資30億興建質子中心，而政府作為管治香港的機構，孤寒過私家醫院，完全沒有將市民放在首位！兒童是社會的棟樑，政府究竟有沒有將兒童放在心內？」
喺獄中一直訂閱《蘋果》嘅佢亦提到，過年前寄咗張囚友製作嘅賀卡去報館，希望傳媒能做到不畏強權，副社長陳沛敏喺專欄回信，點知引來梁振英喺面書幾度出帖批評。盧就喺信中對陳沛敏話：「閣下從來沒有鼓勵年輕人參與『暴動』！每個人都有個人意志！每個人都有獨立思想……」佢話估唔到一張賀卡都會招惹到梁振英，對令陳副社困擾過意不去。不過副社就話，談唔上有乜困擾，希望盧建民繼續支持《蘋果》。
李八方