有時啲嘢，口講冇用，日久先至見人心。好似特首林鄭月娥咁，上任之初話要同民主派修補關係，但係年半任期過去，隨住佢露出惟北京是從嘅真面目，同民主派嘅蜜月期亦告終，將於4月4日兒童節舉行黨慶同籌款晚會嘅公民黨，亦同去年一樣，唔會請娥特、官員同立法會主席梁君彥去；至於有咩特備節目？公民黨話要保持神秘，但黨魁楊岳橋（圖）今日喺公民黨新春團拜話，今年黨慶會比較嚴肅，唔會扮鬼扮馬。
梁家傑鬧林鄭冇膽
嚟緊立法會將會審議衝擊人權嘅《國歌法》、被指賣港嘅《逃犯條例》修訂，作為民主派政黨又真係好難開心。本身係資深大律師嘅公民黨主席梁家傑就以大灣區規劃《綱要》提出香港要成為國際仲裁中心，推銷律師北上發展為例，話香港做仲裁本來就係一個小圈子，現在仲話香港律師要去內地工作喎，咁簽約等問題，跟內地定香港法律？明顯對香港法律界造成衝擊，「佢有冇諮詢過我哋（法律界）？」大鬧林鄭夠膽做、唔夠膽認。對於日後會唔會邀約林鄭會面商討特定議題？楊岳橋話當然唔排除，但現階段都冇咁嘅需要。