喺政府任職37年嘅渠務署署長唐嘉鴻剛展開退休前休假，佢同與傳媒茶敍時話，多年公職生涯最難忘早年處理淨化海港計劃第一期工程，當年要興建23公里長深層污水輸送隧道，但工程遇到地下水問題，承建商又劈炮，好彩最後完到工令維港水質改善，可以游渡海泳。另一次印象深刻嘅工程就係80年代喺路政署處理大埔繞道工程，當年業界仲用緊幾危險嘅手挖沉箱建造方法，聖誕夜佢接通知要去地底檢查扎鐵，膽粗粗同承建商代表兩個踩住個吊桶沉落30幾米地底檢查，有人事後問佢點解咁危險都制，佢就話可能當年後生。
無官一身輕，唐嘉鴻話退休後可以多啲陪伴屋企人，又形容自己係電影癡，一年睇成100套，希望可以狂煲電影，又打算學結他，同渠務署自組樂隊，又話唔打算轉投商界，但政府如果有合適職位都會考慮。