拜仁慕尼黑上周六憑查維馬天尼斯喺下半場一箭定江山，主場以1:0險勝最後得番10人應戰嘅哈化柏林，近11場德甲贏足10場，不過翼鋒京士利高文就傷出，唔知幾時出得番。拜仁今場形勢雖然佔優，但欠缺臨門一腳，結果半場只可以踢成0:0。換邊後，拜仁先喺58分鐘有京士利高文因腿傷而退下火線，而周中喺歐聯有出色表現嘅查維馬天尼斯就喺62分鐘接應角球頂入，為拜仁打破僵局。哈化柏林去到84分鐘有列卻克因為推羅拔利雲度夫斯基落地而領紅，拜仁最終小勝1:0。不過傷出嘅翼鋒京士利高文賽後證實係腿肌撕裂，未知復出日期，亦未肯定踢唔踢到下個月主場對利物浦嘅歐聯16強次回合賽事。