昨日講及鄭明仁老兄搵到一本二十年前出版嘅「左丁山見聞錄」絕版書，要左丁山簽名，那敢不從。過咗三日，天真許（許沂光）話有書相贈，叫左丁山去西營盤尚品會吃午飯，地址在干諾道西。左丁山誤以為就是在信德中心對面，一於行路過去，點知行極都未到，再睇清楚許沂光WhatsApp指示，原來尚品會在西隧入口對開，離信德中心三條街起碼，卒之行足半個小時以上，身水身汗先至摸到上去。
此「尚品會」係天真許飯堂，常在此晚飯唱K及飲午茶，在高樂花園二樓全層，佔地近二萬平方呎，類似私人會所，內有幾間大房，最低消費由八九千至兩三萬元不等，有幾十吋大電視及卡拉OK設備，左丁山一睇，以為係迎合內地豪爽人士吃喝玩樂嘅場所，賣鮑魚只有吉品鮑，其他鮑魚不售，可見一斑。聽天真許講，這裏以前幾乎晚晚爆棚，依家呢？大家明白㗎啦。
大廳飲茶，點心可口，粉麵不俗，算幾好。天真許送乜嘢書呀？不是自己作品，而是請來幾十年前恒生銀行舊同事鄭棣培，送一本佢寫嘅「傅德蔭傳」，鄭兄在男拔萃畢業後，入恒生工作，後獲關士光先生提拔，一齊建立經濟研究部，首創恒生指數，至今為恒生帶來大量有形及無形利益，可見當年恒生董事局之高瞻遠矚。在1970年代初，係香港銀行界創新之作，因為當時只有花旗銀行有一個經濟研究部之設，匯豐都未有，要到1976年左右，鄭海泉加入匯豐為經濟研究員，匯豐才有研究部，當年左丁山因工作關係與關先生認識，跟住認識鄭兄，然後佢介紹天真許見面，眨眼間四十餘年了。
鄭兄在男拔萃有同學傅厚澤（Adrian Fu），就是1950年代澳門賭王之一傅老榕（傅德蔭）嘅長子嫡孫，父親係傅蔭釗。傅厚澤先生於2007年成立傅德蔭基金，委託歷史學者莫世祥及趙利峰兩位教授整理祖父檔案資料及在其他渠道搜集材料，交予同學鄭棣培執筆撰文，為先祖作傳，於2018年12月出版。本書中英並列，英譯者為Stacy Moser，英文就叫做The Fu Tak Iam Story, narrated by Adrian Fu。傅老榕乃戰前及戰後直至1960年代之澳門賭場風雲人物，至何鴻燊霍英東奪得澳門賭權之後，先至逐漸淡出，但早有眼光，知道不能長期倚賴賭業，早已督促子孫在港澳發展其他事業，結果徹底改變了傅家的命運。左丁山小時候聽先父講故事，提及傅老榕高可寧之賭場事迹，但從未讀過兩人之文字記錄，今得棣培兄贈書「傅德蔭傳」，歡喜之至，捧讀必矣。