巴塞隆拿球王美斯，上周六西甲上演佢職業生涯第50次帽子戲法，仲包括一球好靚嘅窩利抽射，另外仲有一次助攻，以一己之力帶領巴塞作客4:2反勝西維爾，為禮拜三對皇家馬德里嘅西班牙盃四強次回合同禮拜六西甲兩度作客打番支強心針！
今場嘅焦點落晒喺美斯身上，22分鐘佢喺前場傳失波，俾西維爾策動快攻，由捷西斯拿華斯禁區內接應賓耶達橫傳射入先開紀錄。不過美斯四分鐘後將功補過，接應拿傑迪錫傳中窩利抽入一球世界波扳平。不過完半場前西維爾再靠中堅加比爾馬卡度射入領先2:1。換邊後美斯繼續發力，67分鐘喺禁區頂接應後備入替嘅奧士文尼迪比利助攻射入再度扳平。到85分鐘，美斯又喺禁區內建功，趁對方守將未及時解圍近門挑射得手，幫巴塞反超前3:2。到補時階段，美斯助攻畀老友蘇亞雷斯單刀埋齋，後者亦打破咗入球荒。
西甲戴帽僅次C朗
今次已經係美斯職業生涯第50次上演帽子戲法，有44次係踢巴塞，當中西甲佔32次，歐聯有八次，西班牙盃同西超盃就分別有3次同1次，而佢喺一向難踢嘅阿根廷國家隊亦都有六次戴帽紀錄。美斯50次戴帽固然好勁，不過佢喺西甲嘅帽子戲法次數都只係排第二箒，排第一位就係佢嘅宿敵基斯坦奴朗拿度（C朗），紀錄係34次。C朗今季已經離開咗西甲，美斯要追都唔難嘅。
美斯賽後就話，要喺西維爾主場贏波係一件難事，今場巴塞全取三分當然開心，不過更重要嘅係球隊可以喺周三同周六硬撼皇馬前振奮士氣：「我哋𠵱家距離國王盃決賽只係差一步，作客皇馬係一件好困難嘅事，但球隊嘅目標係要贏波（首回合和1:1），而且我哋好有信心可以做得到。」
碧基寸爆蘇拿利
另一邊廂，皇馬教練蘇拿利日前就批評西甲賽會嘅安排，話巴塞嘅比賽安排喺星期六踢，而皇馬就要等到星期日先踢，令巴塞比皇馬多一日休息咁話。不過巴塞後衞碧基就唔同意喇，仲好寸咁話就算畀多一日皇馬休息都冇乜用喎：「我哋喺西甲首循環對皇馬嗰陣，佢哋都比我哋休息多一日，最後佢哋咪又係輸1:5。我知皇馬班人好想搵我哋報仇，不過我哋一樣會全力以赴，爭取殺入決賽。」