法國新星基利安麥巴比真係入球停不了！上周六巴黎聖日耳門（PSG）喺主場以3:0大勝尼姆，麥巴比喺嗰場就算食咗兩次詐糊，都仲可以梅開二度，認真巴閉。麥巴比今場喺38分鐘先將個波射入尼姆個網度，但因為越位在先冇計到，不過兩分鐘後PSG都靠尼干古領先1:0。上半場補時階段，麥巴比接應堤亞高施華二傳將個波撞入網，但大家見到佢尷尷尬尬咁笑都知咩事，原來佢係用手拍個波入網，球證睇完VAR後梗係唔計數，仲畀咗黃牌麥巴比㖭。雖然食咗兩次詐糊，但呢位法國超新星下半場繼續發威，去到69分鐘接應祖安巴尼特傳送後輕鬆射入，去到完場前再入一球，幫PSG贏尼姆3:0，呢兩球亦令佢成為喺法甲突破50球大關最後生嘅球員。