每隔幾年就會裝修同翻新吓嘅皇仁書院，今年拓展版圖去到郊遊熱點大潭。早排傳病重嘅賭王何鴻燊亦係皇仁舊生會永遠名譽會長，今次捐164萬出嚟，翻新大潭嘅前獨木舟營地成為天文觀測站，仲添置咗全自動16吋固定光學望遠鏡、同全港最大嘅戶外單天線射電望遠鏡。賭王冇親自出席開幕儀式，由二房女兒何超鳳、超蕸出席，超鳳話爸爸當年得皇仁獎學金支持先讀完中學考入港大，所以非常感謝皇仁栽培，不過現場記者追問佢爸爸病況，佢冇答就走咗。
直徑三米射電望遠鏡全港最大
講番呢兩款望遠鏡，全自動固定光學望遠鏡可謂本港其中一款最先進嘅天文攝影器材，自動對準同追蹤目標天體之餘，仲可以兼影黑白同彩色影像。最犀利係套控制系統唔止電腦用得，安裝咗特定應用程式嘅手機都可以遙距控制支鏡移動同拍攝，在校都可以輕鬆觀天。而另一支射電望遠鏡直徑三米，係全港最大，仲大過港大用緊做研究嗰支，同光學望遠鏡可謂互補不足。
促成觀測站落成嘅港大微生物系講座教授袁國勇話，希望呢個觀測站啟發更多皇仁仔探索科學嘅心。但要做到袁教授相信難過登天，因為佢以前做皇仁仔嗰時，已經研究緊太陽黑子，仲試過同高永文走堂上天台觀賞㗎。
李八方
