新年過後，私人及公司春茗排住隊嚟，呢個星期就有五單，如果每個宴會都去，好唔得閒，記得1975年初入銀行不久就要過年，人生第一次跟分行經理（直屬上司）去出席客戶春茗，以為自己年紀輕，晚晚見到啲魚翅、燕窩或佛跳牆（按：銀行分行客戶主要係海味街入口批發零售商），以為執到寶，畢竟出身板間房嘛，於是係咁擦，經理有時睇到微微嘴笑，有意無意之間，將碗翅畀埋左丁山：「後生仔食多啲，益你。」結果呢？到咗正月尾，個後生仔就身燒頸㷫、喉嚨痛，咳足一個月。幾年後，等到左丁山做咗副經理，帶下屬出席春茗，左丁山就同啲新進見習生講：「後生仔食多啲，益你！」
到而家，邊度可以食咁多呀，一星期去三場已覺辛苦，一於推得就推。但二月十八日年十四，好日也，一晚要趕兩場，六點零就去萬豪出席新城電台雄財宴兼財經台18年台慶，去到已見大把中環商界人士在場，影相selfie都接二連三，一位年青賓客自我介紹，就係中信銀行（國際）嘅Varden Choi（蔡詠贊），佢猛叫師兄，原來係2001年中大聯合書院計量財務系畢業生，讀書時已加入新城財經台「少年股神」節目嘅活動，對投資股票好有興趣，擴闊咗課外知識，一畢業就入咗匯豐做MT，現今係中信銀行商業銀行部執行總經理，果然後生可畏，大把前途。Varden話鍾意聽財經台，鍾意入馬場，係「友瑩囍」馬主團體成員。咦，又啱聽噃，個人興趣與左丁山差不多，以後會在馬場相見。
影咗一大輪相就從萬豪酒店行去香港會，參加之「己亥年春茗」，每年練律師在此設宴，公關大姐大代請傳媒各路英雄出席，俗稱馨香宴，傳媒老總盡皆在此集體互相拜年。不過，呢晚碰上北京發佈大灣區文件，仲要係傍晚時間公佈，於是本地傳媒大哥大姐好唔得閒，一啲遲啲來，一啲早啲走，一啲派代表出席，左丁山問幾位政治專欄編輯，文件有乜重點，幾個都話只講框架，實質內容欠奉，暫時只算係目標口號，還待北京及大灣區政治高人填充內容。又有人講林鄭呢次最威風，上任特首叫做係國家領導人級數，但全無角色扮演，眼光光幾無癮。呢啲嘢講得多就悶，點知鄭明仁老兄帶來驚喜，佢話某日行一間舊書局，在大減價書堆中搵到一本1999年壹出版嘅「左丁山見聞錄」，於是買下帶來要左丁山簽名！呢本書原印兩千本，賣咗一千，左丁山買咗幾十本送畀人，卒之現在自己都冇一本傍身！鄭老兄要簽名，豈敢不從！