車路士禮拜五俾國際足協（FIFA）罰未來兩個轉會窗唔准買兵，事關佢哋違規簽外地嘅U18球員，呢個當然唔係好消息，好彩車仔禮拜四歐霸盃32強次回合，主場3:0炒馬模，合計贏5:1晉級，帥位危危乎嘅領隊沙利總算啪番粒還魂救命丹，而且車仔16強抽中烏克蘭嘅基輔戴拿模，而阿仙奴會對法甲嘅雷恩。
沙利為佐真奴被噓解圍
車路士首回合作客已2:1贏咗瑞典嘅馬模，雖然有主場之利，但車仔第一個入波去到下半場55分鐘先出現，基奧特接應韋利安嘅地波傳中射入，然後馬模中堅貝臣73分鐘兩黃一紅出場，一分鐘後車仔就有巴克里射入罰球，之後沙利換入愛將佐真路費路，佢一入場就俾主場球迷狂噓，認真慘情，去到84分鐘新秀赫臣奧杜爾埋齋贏3:0，合計贏5:1入16強，將會鬥烏克蘭嘅基輔戴拿模。
不過，車仔有壞消息，FIFA處罰佢哋未來兩個轉會窗，即係成個19/20賽季唔准買人，事關車仔2011年簽入嘅布基納法索翼鋒貝特蘭查奧爾，當時只係16歲，而國際足協唔畀歐盟國家球隊簽入未滿18歲嘅非歐盟球員，而當時車仔有向查奧爾阿媽畀錢，FIFA經過三年調查後落實處罰，同埋罰車仔60萬瑞士法郎（約470萬港元），而車仔就發聲明話會上訴。
點都好，贏番場沙利都鬆一口氣，佢不忘為被噓嘅愛將佐真奴講說話，佢話：「有佐真奴喺度，我諗一切都變得更易。我希望球迷明白，佐真奴真係一個非常重要嘅球員。」
艾馬利終派奧斯爾上陣
阿仙奴亦贏得輕鬆，雖然首回合作客以0:1爆冷輸畀白俄羅斯嘅巴迪，但佢哋禮拜四就好醒神，主場靠一個老烏，同埋一對中堅梅斯達菲、柏柏斯達夫普路斯分別接應角球頂入，輕鬆贏3:0，合計反勝3:1晉級。一直都冇上陣機會嘅奧斯爾今場終於打正選，但領隊艾馬利就話，佢未來喺阿仙奴只能繼續以輪換嘅方式上陣。效力巴迪嘅阿仙奴舊將希比喺下半場後備上陣，事隔11年重返阿聯酋球場，接受主場球迷鼓掌歡迎。輕鬆過關之後，兵工廠16強會鬥雷恩，同車仔一樣都係好籤！
