日職周五開鑼，揭幕戰由今季坐擁韋拿、恩尼斯達、普多斯基三巨頭嘅神戶勝利船打頭陣，但唔係巨星多就贏硬，最終作客0:1輸畀大阪櫻花。勝利船將三位外援球星放喺最前，踢3-4-3陣式，呢場作客上季排名高過佢哋嘅櫻花，對方今季已經少咗杉本健勇同山口螢等幾位主力，其中後者仲要去埋勝利船，呢場正選倒戈，但似乎同三巨頭首次夾檔，大家都冇乜火花。
雖然勝利船射門次數比較多，全場控球率亦達六成以上；高過櫻花，但有威脅嘅攻勢就一隻手指數得晒。結果全場唯一入球出現喺77分鐘，櫻花靠一次右路角球攻勢，由丸橋祐介開高波入禁區，勝利船門將金承奎出迎失誤，俾木本恭生頂到後變二傳，益咗門前嘅右閘山下達也頭槌補中，而勝利船失波後亦唔見有咩凌厲嘅反撲，最終首戰就出師不利，輸波告終。