周師奶是街坊，可能是宿世姻緣，跟內子在街市邂逅，一見如故，日日雞啄唔斷。由於她們倆關係太好，周師奶得意地自稱「小三」，呼我「大婆」。我喜上眉梢問內子：「咁我係咪都可以——」話口未完，我的膝蓋已重重跪在主機板上。
言歸正傳，周師奶不知道我做什麼工作，當然也沒看過這專欄。但因為內子曾隨口提過一句「老公走去學算命」，我的生活便從此多事。對一般人來說，「識算命」可能就是「生神仙」的同義詞，結果事無大小，周師奶都來向我請教。農曆新年期間，她就恭恭敬敬，手捧通勝，問我：「大婆，拜年邊個時辰最好呀？」一邊說一邊把通勝遞過來。
我輕輕推開那本通勝，然後鄭重告訴她：「拜年嚟講呢，最緊要留意三件事：第一，對方要喺屋企；第二，對方已經瞓醒，或者未瞓，所以唔能夠太早，亦唔能夠太夜；第三，出門時睇睇有冇塞車。揀吉時，唔係睇通勝，而係打開個巴士App，睇睇幾點有車。」小三說：「扯，使鬼你講咩？咁我唔擇吉時，會唔會好唔順利㗎？」我屈指一算，鐵嘴一批：「一定會！我覺得塵世間最凶險嘅事，就係出世。人一出世就會死，仲肯定諸事不順。如果你想絕對順利，就唔應該去拜年，正如最好命嘅人，根本唔會出世。」
過了幾天，周師奶到黃大仙拜神，求了一支籤，問家宅，又恭恭敬敬拿着通勝和籤文來求教。籤文題為「魯肅索荊州」，中平：「遙遙千里來西蜀，欲問荊州那日還。劉叔不言雙淚下，自思無策轉吳間。」So？小三緊張地問：「解籤師傅好準呀！一睇支籤，就問我大門係咪向東北。我話係，然後佢就問我：呢輪屋企人係咪有病？又講中咗啦。佢揭開通勝，畀咗幅圖我睇，話今年東北係病位，又講咩五黃煞氣……唔記得啦……總之叫我做啲儀式化解。我返屋企睇本通勝，睇極都唔明，你可唔可以解解？」
她揭開通勝，有一幅九宮飛星圖（我去年在專欄已解釋過，參見〈人工島的風水〉），滿臉疑惑：「師傅又話今年五黃喺西南方，我睇嚟睇去，明明係東方咋喎！」呢個moment我只能長嘆一聲，施展終極絕招「一陽指」。我用盡洪荒之力，指住頁頂三個字：庚，子，年。我說：「呢幅圖係2020年㗎，阿姐。」然後我用三秒時間翻到今年的飛星圖，指出「己亥年」三字。
周師奶一邊看，一邊又把通勝塞給我：「病位喺邊呀？快啲睇快啲睇！」我像上次一樣輕輕推開通勝：「你畀我唞唞好唔好？呢幅圖闔埋眼都識畫啦，唔使畀我睇。八白入中，東北二黑，就係所謂死氣，即解籤師傅話嘅病位，但風水笨唔係咁睇㗎。你個廁所喺死氣位，唔通你全年便秘咩？睇風水，要考慮埋你層樓幾時落成，再計算坐向卦氣，諸如此類。個師傅有冇問你住咩樓呀？」
周師奶眉頭深鎖：「太複雜啦，睇呢幅圖就得㗎喇！」我微笑回應：「根據風水理論，要易明，就唔會準；要準，就唔會易明。咁唔好講風水。我問你：你屋企人最近係咪有感冒之類呢？」她很驚訝：「係呀！你點知㗎？」「因為最近係流感高峰期吖嘛。我唔係門向東北，但都有病呀，使唔使打個乞嚏證明畀你睇？」
周師奶接着問我：「師傅話呢支籤『忌西方遠行』，係咪咁解？」我笑了：「第一句寫『遙遙千里來西蜀』，因為有個西字，就唔可以去西方旅行？咁佢有冇話唔好去西環？劉備借荊州，一借冇回頭，黃大仙擺明叫你哋今年唔好隨便借錢，收唔返㗎。」她大吃一驚：「上個禮拜，我老公已經借咗錢畀人！」
聽到這句話，我只能抱拳恭喜，展示李嘉欣的經典笑容。