老牌球會曼聯向來多球迷，球員亦特別受人關注，有乜行差踏錯都好難走得甩，賤男多嘅形象亦好深入民心。好似基斯坦奴朗拿度當年同路爾斯安達臣一齊開性愛派對，名宿傑斯勾搭弟婦，仲有朗尼嫖妓、路爾斯華倫西亞背妻偷嗒護士等等，呢啲負面新聞每隔一段時間總會出現，而法國球星安東尼馬迪爾似乎做咗接班人，成為曼聯新一代賤男，最近佢喺ig出post，就疑似係因為之前被爆偷食嘅事件向未婚妻美蓮妮（Melanie da Cruz）道歉。
要求索模傳裸照
最近同曼聯續咗長約嘅馬迪爾，喺ig上載咗一張同美蓮妮嘅合照，仲寫住話「我想向我嘅親戚同我美麗嘅家人，特別係我未婚妻，就我近月所造成嘅傷害道歉！我犯咗錯，我好抱歉，呢啲事唔會再發生！」馬迪爾並冇指明為乜事而道歉，但根據之前嘅報道，馬迪爾舊年七月曾經喺美蓮妮大緊肚期間出軌，喺巴黎一間酒店同模特兒Malika Semichi上過床。據報Malika喺六月識咗馬迪爾之後，開始收到佢嘅露骨短訊同相，馬迪爾仲要求Malika傳裸照畀佢。Malika話知道馬迪爾有女朋友，佢唔想追求一段咁嘅關係同受傷。雖然兩個人之後都有聯絡，但關係喺11月正式結束，當時Malika已經搬咗去邁阿密。值得一提，美蓮妮喺七月尾就為馬迪爾生咗囝囝Swan，係佢哋兩個嘅第一個愛情結晶品。
背妻偷食有前科
之不過如果大家唔善忘嘅話，應該記得美蓮妮本來都係「小三」。馬迪爾本來同老婆莎曼花已經有一個囡囡，2015年佢加盟曼聯、一家三口由摩納哥嚟咗曼市之後仲成日喺ig晒恩愛，點知識咗美蓮妮之後就搞到離婚收場，莎曼花更加將佢ig私人賬戶入面同馬迪爾嘅合照鏟走晒。而其實早喺16年，英國傳媒都曾經爆料，話馬迪爾背妻同英國模特兒愛美莉（Emily Wademan）喺巴黎幽會，睇嚟馬迪爾嘅風流賬都真係唔少。