噚日嘅粵港澳大灣區規劃綱要宣講會仲有一個亮點，就係盛傳係下屆澳門特首熱門人選嘅澳門立法會主席賀一誠同埋經濟財政司司長梁維特都有到場，仲安排坐在第一行，不過佢哋兩個就唔係好肯講去馬問題。八方喺宣講會後追問賀一誠，係咪已決定參選特首，同埋點睇外界視佢為大熱門，但賀一誠只係揮手笑而不語，之後就快步離開。至於梁維特完咗宣講會後亦急急腳走人，想問佢兩句係咪參選都冇機會。
崔C安廣東話發言掃興
除咗兩個下屆澳門特首熱門人選，現任澳門特首崔世安亦有到場發言，崔世安普通話「太普通」已港澳聞名，但佢今次喺宣講會上以廣東話發言，話澳門已成立工作委員會，將施政的5年規劃對接大灣區綱要，全力搞大灣區規劃建設，不過佢冇用普通話發言，娛樂性同吸引力即時大減，相信好多人好失望。