今年係六四屠城30周年，差不多每年都會以六四為主題創作舞台劇嘅「六四舞台」，今年將會上演一套名為《5月35日》嘅作品，編劇由《短暫的婚姻》編劇莊梅岩負責，由《香港式離婚》導演李鎮洲執導。
5月35日就係6月4日。六四舞台喺fb為《5月35日》宣傳，話呢套劇係講述一對年邁夫婦嘅遭遇，兩人唯一兒子喺30年前「死於不自然」，至今真相仍然不明不白，二人決定要喺5月35日當天，堂堂正正去拜祭兒子，並擲地有聲拋下一句：「在不正常國家的陽光底下做正常的事也是不合法的。」
《5月35日》將於5月底公演四場，票價由180元至320元，3月18日前可透過網上優先預留座位兼享折扣優惠，門票320元的優惠價為290元，有興趣嘅朋友可以上mailto:www.art-mate.net訂票。