一次真愛追尋一百次，都已經是上世紀的事，追了一百次仍未找到真愛，就像考了一百次車牌仍然肥佬，你應該檢討自己。
這次主角不是追尋真愛一百次，而是要求應機的女上司，她足足要求下屬應機100次！
打工仔和女上司有一個共4人的WhatsApp group，女上司在新年期間，在group內發脾氣，甚至發了瘋連續發了一百次「應機啊」的訊息炸同事。網友咸稱「變態女上司」。
仔細研究，這位變態女上司有以下問題。
第一，一味靠嚇。女上司在谷內留言稱「唔好諗住立春唔發脾氣呢就諗住全年都好啊…扮晒嘢唔識發脾氣嗰啲啊，小心年頭衰到年尾啊…」
呢句「年頭衰到年尾」真係報警告恐嚇應該都會開到file，而且好無智慧。一個上司詛咒自己下屬年頭衰到年尾，對自己對條team對公司有咩好處呢？難道這位上司的詛咒分得這麼清楚，這個下屬的「衰」只限個人生活而和工作無關？但員工生活不愉快，工作也很難積極，所以女上司詛咒下屬年頭衰到年尾，即是詛咒自己。
第二，「明唔明我講咩啊，明嘅應機。4:59。係咪忙都唔識應機呀。5:11。」這段訊息可見女上司超無耐性，由4:59分到爆炸的5:11，不過十分鐘時間，十分鐘都等唔切不如直接打電話啦。重點是，你明明話「明嘅應機啦」，咁即係「唔明就唔駛應機」，咁如果同事唔應機，咪即係同事唔明囉。等於小巴司機問「有無落？有落就出聲。」然後全車沉默，難道小巴司機又要發狂「係咪唔識應機啊？有落就出聲啦。」大佬！無落咁點出聲啊？
女人也可以不發癲而展現強勢，看看美國眾議院長佩洛西，面對一個癲狂的特朗普，毋須鬥癲，只須一個輕蔑眼神和反諷拍掌，便足以KO對手。