已故中共領導人毛澤東嘅政治秘書、被視為中共內自由派元老嘅李銳早前逝世，噚日喺北京八寶山設靈，香港好多媒體都有派駐京記者採訪，雖然記者不能入場，但多間電視同電台都有相關報道，不過有人發現大台嘅六點半新聞竟然冇報，因乜解究？
八方聽聞坊間流傳不同小道消息，有人話TVB記者有去現場，仲入到靈堂，但俾人捉咗出嚟，但咁都冇理由唔報㗎！亦有傳TVB被要求「不能」報道，因李銳曾罵習近平「只有小學程度」。更有消息話中聯辦直接向無綫新聞部高層下命令，不得報道相關新聞，所以TVB助理總經理（新聞及資訊）袁志偉就下令唔好報道。
袁︰咁具體嘅嘢我唔會講
既然咁多傳聞，八方就梗要打電話問問袁志偉，無綫有冇派員採訪李銳追悼會喇，袁志偉就答八方：「呢啲咁具體嘅嘢，我唔會講㗎喎。」隨即收線，之後八方再打畀佢問多幾句，但電話已經冇人聽。其實根據噚日電視同電台報道，李銳遺體有蓋上黨旗，靈堂仲放咗習近平、總理李克強等領導人送嘅花圈，即使報道有關新聞，又有乜問題呢？
李八方