【黑鏡線索】
經營startup總會遇到難題，遇到難題，唔會下下都搵同事傾，一來，你搵邊個傾先唔會令其他同事產生誤會，係好深嘅學問。二來，同事未必試過喺相近視角，面對過呢類難題。三來，旁觀者清，冇直接利害衝突嘅人，可以更快直搗問題嘅核心，唔會俾潛藏嘅難言之隱蒙蔽。
掉返轉頭，認識嘅創業人，叫到嘅話，都好樂意畀吓意見。一來，公司話事人關心嘅難題，通常都係幾有趣，幾有挑戰性。二來，平時各公司總會專注講自己點勁點好，所以容易有個錯覺，點解得自己咁困難，當你聽到原來人哋都有困難，你會覺得唔係自己先有問題。三來，好多時你幫手諗人哋嘅問題嘅時候，會忽然間解答埋自己嘅問題，幫人幫埋自己。
同事有問題等答案 老闆最𤷪
有個朋友，平時都係有問必應，但佢發現，惟獨是對住個別同行，佢硬係好唔情願去幫手傾。所以問題係，有乜嘢因素，會影響其他人幫手嘅意欲？
其中一個有趣嘅因素，係問人嘅人，有冇表現出不合比例嘅倚賴。令我諗起，行內有個講法，當你搵投資者嘅時候，投資者問，如果我唔投你，咁你會點，你千祈唔好答話咁冇錢就唔做。點解呢個係大忌？我估，除咗因為好老套嘅我愛的人不愛我嘅心態，係因為，投資者睇自己嘅角色，係助力，而唔係主力。所以當個創業人講到筆投資係make or break咁樣，就變成一個不合比例倚賴嘅情況。
另一個例子，係同事。唔少話事人，最𤷪嘅情況係，同事有問題，走埋嚟問，老闆，有個咁咁咁嘅問題喎，點算呀？就咁拋底一句，等答案。喺呢啲情況，話事人嘅責任，係令同事清楚明白，要求嘅水平，其實係同事自己諗埋有乜唔同辦法，同埋各辦法嘅優劣等等。甚至乎，要同事學識判斷，有乜事情係可以自己先做決定。喺自己職責範圍之內，旨意有個方案從天而降，正正係不合比例倚賴嘅問題。當然，凡事有例外，總有話事人鍾意micro manage，呢個係另一個話題。
喺屋企嘅同類情況，係你嘅仔女，做做吓功課，成本書隊過嚟，老竇，唔識喎，點做呀？然後望住你，好似想你幫佢成本做埋佢咁樣，真係火都嚟，又係不合比例倚賴嘅問題。如果你真係就咁賜個答案畀佢，咁以後就有排受。喺呢啲情況，短痛嘅做法，當然係令個細路清楚明白，想問功課，得，你先講吓你覺得個答案係乜，唔知都估吓，冇理由長期條條都毫無頭緒啩。
助長不合比例嘅倚賴 幫倒忙
講返朋友嗰個例子，用返呢個框架，原來佢唔樂意幫個別同行解難，係因為佢覺得，個同行自己冇乜諗法，問佢嘅心態，係覺得成個決定，就係靠晒佢諗，而成件事，係要我朋友幫手諗完之後，先可以繼續進行，咁就變成不合比例嘅倚賴。我同意，選擇唔去助長呢個倚賴，可能係最幫倒忙嘅做法。
撰文：宋漢生