立法會主席梁君彥三年前選主席鬧出國籍風波，議事規則委員會噚日提出修改《議規》，要求參選主席嘅議員要做法定聲明，聲明自己符合《基本法》對主席嘅要求，即係年滿40歲、連續居港滿20年，同埋係冇外國護照嘅香港永久居民中嘅中國公民。
經民聯冇人幫拖
專業議政梁繼昌提及梁君彥搞出單國籍風波，同埋希望可以再改《議規》，規定主席唔可以做上司公司董事。到公民黨郭家麒，郭左一句「崩口人忌崩口碗」，右一句話梁君彥做咗12年議員都冇放棄英國護照，「愛國愛港人士好有趣」。譚文豪亦唔執輸，一開波就話成單嘢係因為梁而嚟，然後明寸梁臨選主席先放棄英國護照係「中狀元救母親，時間啱啱好」。區諾軒就嚴肅啲，佢擔心改議規只係妥協做法，事關秘書處係唔會核實資料係咪堅嘅。
經民聯冇議員出聲，主席梁君彥只有硬食，反而民建聯張國鈞出聲，話呢次改議規只係確保主席冇外國護照，但防止唔到冇外國籍嘅人喺議會幫外國講說話。最後喺毋須記名表決下通過咗修改。