周日嘅西甲聯賽上演中國球迷最期待畫面，效力愛斯賓奴嘅武磊首度正選登場，作客華倫西亞賽和0:0。由於皮亞堤因傷缺陣，身穿24號球衣嘅武磊得以正選上陣。今場武磊踢咗72分鐘，下半場有一次頭槌攻門高出，只不過首次正選披甲表現唔及上仗，賽後佢評分屬兩隊最低。雖然武磊仲未有波入，但自佢加盟後，愛斯賓奴至今仍保持不敗，都算係個福將吖。